Yeni istifadəyə verilmiş Gəncə Futbol Akademiyasına media tur təşkil olunub. Akademiya ilə tanışlıqdan sonra AFFA-nın Baş Katibi Serxan Hacıyev jurnalistlərin suallarını cavablandırıb.

Futbolpress.az xəbər verir ki, o, əvvəlcə akademiyanın əhəmiyyətindən danışıb:

- Gəncə Futbol Akademiyası  AFFA, FIFA və UEFA-nın dəstəyi ilə tikilib. Sözügedən baza Azərbaycanda ən böyükdür. Düşünürük ki, bura fəaliyyətə başladıqdan sonra ölkə futboluna müsbət töhfəsini verəcək. Ərazidə 2 təbii, 1 süni məşq meydançaları inşa olunub. Həmçinin, Gəncə şəhərində əlavə olaraq son illərdə 2 mini meydança salınıb. AFFA hər zaman regionlarda infrastruktur layihəsi keçirir. Hər bir bölgəyə bərabər şəkildə yanaşma olmasını istəyirik.

- Növbəti bazanın harda olacağına dair məlumat var?
- Hələlik bu barədə nəsə deyə bilmirik. Onu deyə bilərəm ki, növbəti illərdə digər bölgələrdə də bazalar olacaq.

- Oyun alqı-satqısı ilə bağlı məsələ nə yerdədir? Günahlarlar nə vaxt cəzalandırılacaq?
- Hazırda bu məsələ ətrafında tamamlama işləri gedir. Yaxın günlərdə bu məsələyə dair konkret qərarlar veriləcək.

- Premyer Liqa klubları arasında adı danışılmış oyunlarda hallananlar var?
- Bu siyahıda ancaq I və II Liqa klublarıdır.

- Aprelin 2-də yeni AFFA-da yeni prezidenti seçkiləri keçiriləcək. Sərxan Hacıyev yeni komandada təmsil olunacaq?
- Baş katibin təyinatı prezidentin tövsiyəsi və İK-nın qərarı ilə olur. Hazırda bu məsələ ilə bağlı dəqiq qərar yoxdur.

- Dünən "Qarabağ"ın oyununu yaqin ki, izlədiniz. Hansı hissləri keçirdiniz?
- Dünən keçirdiyimiz hissləri sözlə ifadə etmək çətindir. "Qarabağ" bir mövsüm ərzində Avropada iki böyük tarix yazdı. Komandamız 1/16 və 1/8 finala vəsiqə qazanmaqla buna nail oldu. Fürsətdən istifadə edib komandanı təbrik edirik. Dünənki oyunda rəqibin gücünü də nəzərə alsaq, deyə bilərik ki, bu, qələbəyə bərabər məğlubiyyət idi.

- Elxan Məmmədovun vaxtında İsmayıllıda 2 meydança tikilməli idi. Biri inşa olundu, digərinin yeri də bəlli idi, amma inşa edilməyib. O məsələ ilə bağlı hər hansı yenilik var?
- Belə bir layihə var idi. Söhbət mini meydançadan gedir. Bundan başqa layihə var idi ki, müxtəlif bölgələrdə meydançalar salınacaq. Amma daxili məsələlərə görə bu işlər dayandırıldı. Layihəni yenidən bərpa etmək üçün zaman var, sadəcə buna zaman lazımdı.

- Mövsümün sonunda Premyer Liqada komanda sayı artırılacaq? Həmçinin idman prinsipləri mövsümün sonunda qorunacaq?
- Sonuncu yeri tutan komanda Premyer Liqanı tərk edəcək. İdman prinsipləri mütləq şəkildə qorunacaq. I Liqada qalib komanda Premyer Liqaya vəsiqə qazanacaq. Növbəti mövsüm üçün komanda sayının artması hazırda müzakirə mövzusu deyil.

- Millinin baş məşqçisi barədə hansısa yeni xəbər yoxdur? Hələ də yerli məşqçinin axtarışı gedir?
- Bu suala cavab vermək üçün zamana ehtiyac var. Məsələ ilə bağlı İşçi Qrupu yaradılıb və fikir mübadiləsi aparılır. Baş məşqçi hansı kriteriyalara cavab verməlidir onun müzakirəsi gedir.


- Son günlər AFFA-nın prezidentinin kim olacağı ilə bağlı iddialar səslənir. Bəziləri Rövşən Nəcəfin prezident olacağını deyir Bu barədə nə deyə bilərsiniz?
- Rəsmi məlumat yoxdur. Nizamnaməyə uyğun olaraq prosedur aparılır. Bu işlərin məxfiliyini qorumalıyıq. Onu qeyd edə bilərəm ki, bu məsələ ilə bağlı rəsmi qaydada kimsə müraciət etməyib. Konfransa 10 gün qalmış kabitbliyə bu barədə müraciət olunmalıdır.

- Böyük ehtimal "Qəbələ" I Liqaya düşəcək. Klubun yaxşı infrastrukturu var. Onu saxlamaq çətin olacaq, çünki ayrılan maliyyə azalacaq. Bu barədə fikirləriniz nədir?
- Qəbələdəki infrastruktur ən böyük bazalardan biridir. Bu barədə söz demək çətindir.

- Yeni qanuna görə 20 faiz vergilərin qalxması klubların büdcəsinə təsir edir. Yeni mövsümdən Dövlət tərəfindən ayrılan büdcədə artım gözlənilir?
- Bu məsələ hazırda müzakirə mövzusu deyil.

- AFFA və Rabitə Bank arasında müqavilə imzalandı. Müqavilənin şərtlər nədir?
- Müqavilənin şərtlərini açıqlaya bilmərik. Amma formaların istifadəsi yaxın vaxtlardan başlanılmalıdır. Müddəti isə 3 illikdir.

- Klublar bəzən hakimliklə bağlı şikayət edir. Bu yöndə fikirləriniz nədir?
- Müəyyən müsbət məqamlar var. Bir sıra oyunlarda VAR-ın müdaxiləsindən sonra düzgün qərarlar verilir. Bəzən səhv qərarlar da olur. Qeyd edim ki, yaxın gələcəkdə yeni akademiya açılsın. Daha çox gənc hakimlərin yetişdirilməsidir.

- Barış Şimşəklə müqavilənin müddəti uzadılacaq?
- Bu hələlik gündəmdə deyil.

Məlik Məlikov