"Ona demək istəyirəm ki, başından böyük danışmasın"

"Xəzər Lənkəran" klubunun müdafiəçisi Elnur Allahverdiyevin "FutbolPress"ə müsahibəsi

- "Xəzər Lənkəran" yeni mövsümə uğurlu start verib. 6 oyundu məğlub olmur. Bunu nə ilə əlaqələndirərdin?
- Komandamızın hazırki heyəti çox güclüdü. Hər kəs üzərinə düşən məsuliyyəti yaxşı anlayır. Bütün oyunlara ciddi hazırlaşırıq. Rəqiblər arasında fərq qoymuruq. Heç bir kluba yuxarıdan aşağı baxmırıq. Kollektiv və sürətli oyun sərgiləyirik.

- "Qarabağ"la oyun barədə nə deyərdin?
- "Qarabağ" kimi klubla oyuna həmişə ciddi yanaşmışıq. Rəqibin futbolçuları bir-birinə çox uyğunlaşıb. Demək olar ki, oturuşmuş heyətə malik komandadı. Meydana ancaq qələbə üçün çıxmışdıq. Liderliyimizi davam etdirmək üçün 3 xal qazanmalı idik. Buna da nail olduq.

- Qırmızı vərəqə aldın və komandanı azlıqda qoydun...
- Bu futboldu. Meydanda hər şey ola bilər. Qırmızı vərəqə aldığıma görə üzülürəm. İstəməzdim belə olsun, ancaq bu mübarizədi. Bilərkdən etmədim, komandamın qələbə qazanması üçün can yandırıram. Meydandan qovulduğum üçün çox təəssüflənirəm.

- Klub rəhbərliyi səni cəzalandırdı?
- Oyundan sonra rəhbərlik öz iradını bildirdi. Başa düşürəm ki, qırmızı vərəqə alıb komandamı azlıqda qoymamalıydım. Klubun daxili intizam qaydaları var. Ona görə müəyyən tədbirlər görüləcək. Cəza veriləcəyi ilə bağlı mənə hələ bir söz deyilməyib.

- Rauf Əliyevi qəsdən zədələdiyin deyilir...
- Mən heç vaxt bilə-bilə elə hərəkət etmərəm. Raufla millidə komanda yoldaşıyıq, "Qarabağ"da da birlikdə oynamışıq. Əgər bilərəkdən onu zədələdiyimi deyirsə, çox səhv edir. Raufun yerində hər kəs ola bilərdi. Mənim də ayağım zədələnərdi. O demək deyil ki, qəsdən etdim. Heç kim bundan sığortalanmayıb. Kim ki, haqsız danışır, allah onun cəzasını verəcək.

- Səni kobud futbolçu kimi xarakterizə edirlər...
- Çoxları elə deyir. Başa düşə bilmirəm ki, niyə belədi. Necə oynamalıyam, mən qızam, yoxsa futbolçu... Müdafiəçiyəmsə, borcumdu hücumların qarşısını alıb, qol vurmalarına imkan verməyim. Arada sərtlik olursa, o demək deyil ki, kobud futbolçuyam. Ola bilsin, oyun üslubum belədi. Amma heç vaxt bilərəkdən kiməsə zərər verməmişəm.

- Qurban Qurbanov mətbuata açıqlamasında bildirib ki, Elnur Raufdan öncə Əfranın ayağını sındırmaq istəyirdi...
- Ola bilsin ki, Qurban müəllim o sözü hirsli deyib. Mən belə hərəkətə yol vermərəm. Bu fikirlə də razı deyiləm. Onun ayağını niyə sındırmalıyam? Düzdü, sərt oynaya bilərəm, axı mən müdafiəçiyəm. Hansı hücumçu olursa olsun, mənim birinci prinsipim həmin futbolçuya "əl-qol" açmağa imkan verməməkdi.

- Əfran İsmayılov deyir ki, Elnur hələ qarşılaşmadan əvvəl mənə deyirdi ki, Əfran, oyunda səni belə edəcəm, elə edəcəm... Görüşdən əvvəl nə baş vermişdi?
- Oyundan əvvəl meydana çıxmışdıq. Rəqib komandanın bütün üzvləri ilə görüşdük. Həmin vaxt Əfranla zarafatlaşdıq. Əgər o, bunu başqa istiqamətə yozursa, mənim ona sözüm yoxdu. Eşitmişəm ki, oyunda onun ayağını tapdaladığımı, buduna vurduğumu deyib. Bunlar futbolçuya yaraşmayan sözlərdi. Mənə çatmır ki, o, meydana futbol oynamağa çıxmışdı, yoxsa ayağını, budunu tutmağa? Əfran İsmayılov qızdı bəyəm? Kişi kimi mübarizə aparsın. Bu futboldu. Yeri gələndə baş da sınar, ağız da əyilər. Əfran açıqlamasında deyib ki, Elnur elədi, belədi. Ona demək istəyirəm ki, başından böyük danışmasın. Öz futbolunu oynasın. Hələ Azərbaycan futboluna heç nə verməyib. 1-2 ildi başlayıb oynamağa. Bir az keçsin sonra Elnur haqda danışmağa başlasın.

- "Qəbələ" ilə oyun barədə...
- Komandada əhval-ruhiyyə əladı. Düzdü, mən bu oyunu buraxmalı olacam. Ancaq inanıram ki, ev oyunumuzu da qələbə ilə başa vuracağıq. 6 oyundu məğlub olmuruq. Uğurlu çıxışımızı bundan sonra da davam etdirəcəyik. Rəqib də güclü komadadı. Baxamayaraq ki, "Neftçi"yə uduzublar, amma meydana qələbə üçün çıxacaqlar.

Asəf ZEYNALLI