Oğru elə bağırdı, doğrunun bağrı yarıldı

Azərbaycanlı məşqçilər iki məqamda danışmağa başlayırlar; biləndə ki hansısa klubda və ya yığma komandada məşqçi dəyişikliyi gözlənir, onda, bir də uzun müddət işsiz qalanda. Məqsəd güdürlər. Qalan variantları bilirsizsə, sayın, gəlsin...

Şahin Diniyevin son vaxtlar fəallaşması, dil-dil ötməsi mənə də maraqlı gəlir. Həm də heç vaxt olmadığı qədər tonla danışması, onu tanıyanın lap tərs damarına düşür. Bir neçə il əvvəl Ukrayna millisinə biabırçı hesabla uduzan millinin ictimai qınağın təzyiqində əzilməsi Diniyevin "Şəfa"da mətbuat konfransı keçirib media qarşısında hesabat verməsi ilə nəticələndi. Daha doğrusu, hesabat verməli olan Diniyev həmin konfransda "torbatikənlər dəstəsi"ni suçlu bilmişdi, komandanı günahlandırmışdı, ancaq daha vacib suallara cavab verməmişdi.

Serbiya ilə Bakıdakı rəsmi oyundan sonrakı konfransda Diniyevin acizlikdən vahiməyə düşmüş halını gördükdə, yazığın gəlməkdən başqa çarən qalmırdı. Dəfələrlə ondan problemləri açıb danışmağı istəmişdik, amma elə hey "AFFA yaxşıdı, qalan hər şey pisdi" deyib, dururdu.

İndi Diniyevin fikirlərini tirajlamağın məntiqini anlamadığm üçün buna ehtiyac da görmürəm. Futbolumuzun ziyalısı? Ziyalı belə olar? Özünə sərf edən məqamda açıq-aşkar danışsın, tənqid etsin, etməyəndə sussun... Beləsinə "intellektual dələduz" deyərlər...

Son açıqlamasında da, kişi, radikal danışıb: "Foqtsun dedikləri sadəcə pafoslu sözlərdi. 2016-cı ildə milli komandamızın Avropa çempionatının final mərhələsinə çıxması qeyri-mümkündü. ...O, Azərbaycan xalqını aldatmaqla, barmağına dolamaqla məşğuldur. Alman məşqçi millimizdə daha çox qalmaq üçün belə fikirlər səsləndirir. Amma unutmasın ki, bu ölkədə də futbolu başa düşənlər var".

Diniyev, sadəcə bunu demək bəsdi: vaxtında siz də Foqts kimi AFFA-dan heç olmasa, millinin normal məşq keçməsi üçün stadion tələb edərdiz. Təlim-məşq toplanışlarını demirəm hələ. Axı hansı ixtiyarla Foqtsu söz, "qarğış" atəşinə tutursuz. Futbolçular onun hesabına təlim-məşq nə olan şeydi, komanda necə səfər edər, necə meydanda taktika üzrə oynayar - ən azı bu şeyləri öynəbilər, nəyi qoyub, nəyi danışırsız...

Kifayət qədər vaxtınız oldu, hanı millidəki əməyinizin nəticəsi? Niyə millinin gələcəyinə də şübhəylə yanaşmalısız? Axı uzun müddət baş məşqçilik sizin ixtiyarınızda olub. Komandaya viranə qalmış "Ədliyyə" stadionunda məşq elətdirməyiniz unutmusuz?! Olmazdımı, heç olmasa normal stadion tələb edəsiz?! Edə bilməzdiz! Çünki qorxurduz! Tələb etsəz, rəhbərliyin kefinə düşər, sizi qovardı. Çəkinirdiz. "Təki pul qazanım, işim getsin" düşüncəsi ilə yanaşırdız işə. İndi isə yüksək tonla millini heç olmasa, görüntü baxımından da olsa, ağ günə çıxaran Foqtsa hücum çəkmisiz...

Bəli, Foqts kifayət qədər ittiham olunası və tənqidlərə layiq bir məşqçidi. Ancaq bu tənqidi sizin kimi "mütəxəssislər" edəndə, onun təsiri sıfıra enir. Çünki sizin cızdığınız karyeranın yarısını yazıb, insanlara bildirsək, üstünüzə qiyama qalxarlar. Sakitcə oturun yerinizdə, kimsə, hansısa klub iş verər, başınızı salıb, gedib işləyərsiz orada. Millinin keçmişi və gələcəyindən danışmaq üçün sambalınız yetmir...

Elçin