"Kimsə məni və ya Nizami Sadıqovu işindən uzaqlaşdırmaq planı qurursa, sözüm onlaradı..."

Dünən "Neftçi"nin vitse-prezidenti Tahir Süleymanovun fanat.az saytında dərc olunan müsahibəsində KİV-lə bağlı məqamlara futbolpress.az saytının etirazı ilə tanışsız. Etirazımız ona idi ki, Süleymanov "Turan" - "Neftçi" oyunu ətrafında yaranmış qalmaqalı işıqlandıran mətbu orqanları məkrli olmaqda suçlayarkən, konkret ünvan göstərməmişdi. Biz isə öz növbəmizdə "Neftçi"nin rəsmisini obyektiv olmağa, məlum qalmaqallı olaylar haqda araşdırma, tənqid yazan KİV-ə qarşı ittihamda konkret ünvan bildirməyə çağırmışdıq.
Süleymanov bu etirazımızla əlaqədar saytımıza rəsmi müraciət edərək müsahibəsində KİV-lə bağlı dediklərinə aydınlıq gətirdi. Müraciəti Sizə təqdim edirik: "Futbolpress.az saytı olaraq sizin müsahibəmdə mətbuatla bağlı məqama etirazınızı haqlı qəbul edirəm. Azərbaycan futbolunda tənqidi normal qarşılayan və mümkün olduğu qədər bu tip yazılara konstruktiv yanaşmağa çalışan bir şəxs kimi bildirirəm ki, sizin kollektiv haqda çox müsbət rəyim var. Hələ "Futbol-Press" qəzetindən tanıdığım kollektiv bu gün fəaliyyətini elektron KİV-də davam etdirir və həmişəki kimi, sizi, obyektivliyini qoruyan azsaylı mətbu orqanlardan biri kimi tanıyıram. Etirazınıza səbəb olan müsahibəmdə nəzərdə tutduğunuz "Biz "Neftçi»yə gələndən sonra komandada nizam-intizam yaratdıq, psixoloji vəziyyəti yüksəltdik. Bundan sonra bəzi adamlar klubun içərisinə daxil olub, öz məqsədlərini həyata keçirə bilmədilər. İndi bu işlərlə həmin adamlar məşğul olur. Belələri mətbuatda da var, futbol ictimaiyyəti arasında da. Çox təəssüf ki, bəzi mətbuat nümayəndələri də onlara dəstək verir"- hissəsinin qəti şəkildə futbolpress.az saytına aid olmadığını bildirir, saytınızda "Turan"-"Neftçi" oyunu barədə dərc olunan yazılara normal yanaşıram. Mən həmişə olduğu kimi, yenə də vurğulayıram ki, Azərbaycan futbolunun inkişafı mətbuatsız mümkün deyil. Sadəcə, hələlik adını açıqlamağı lazım bilmədiyim bəzi qüvvələrə sizin sayt vasitəsilə də bildirmək istəyirəm ki, kimlərsə məni və Nizami Sadıqovu ("Turan"ın baş məşqçisi- red.) işindən uzaqlaşdırmaq planı qurursa, sözüm onlaradı: Mən sizin hansı "oyunlardan" çıxdığınızı yaxşı bilirəm. Amma narahat olmayın, kələyiniz baş tutmayacaq".
Süleymanov həmçinin bildirdi ki, yaxın vaxtda bu olayları şişirtməkdə maraqlı olan qüvvələri ifşa edəcək: "Hələlik bir az da müşahidə aparıram. Əgər məkrli niyyətlərindən əl çəkməsələr, elə sizin saytınıza açıqlayacam həmin qüvvələrin kimliyi və çirkin planları haqda"

P.S. Gözləyəcəyik, cənab Süleymanov... Açıqlamanı.