MAHMUD QURBANOV: MƏN ELƏMƏMİŞƏM...
"Mən Rəsul Şükürsoyun kim olduğunu bilmirəm. Küçədə qarşılaşsaq belə, tanımaram. Sadəcə olaraq, bir dəfə qəzetdə onun yazısını oxumuşam". "Qafqazinfo"ya açıqlamasında "Bakı" klubunun oyunçusu Mahmud Qurbanov belə deyib.
Veteran futbolçu "KomandA"nın əməkdaşı Rəsul Şükürsoyun bıçaqlandığı barədə heç bir məlumatının olmadığını bildirib: "Hadisədən xəbərim yoxdur. Onsuz da problemlərim var. Hadisəylə bağlı adımın hallanmağı məni narahat edir. Mən futbolçuyam, cinayətkar deyiləm ki, kimisə bıçaqlayam. Düşünürəm ki, onlar belə hadisələrlə gündəmə gəlmək istəyir".
Xatırladaq ki, Mahmud Qurbanov avqustun 22-də "KomandA" qəzetinin redaksiyasına hücum edərək baş redaktor Rəşad Ergünə xəsarət yetirmişdi. Bu gecə isə qəzetin köşə yazarı Rəsul Şükürsoy naməlum şəxslər tərəfindən hücuma məruz qalaraq, qolundan bıçaqlanıb.