Jurnalistin vəziyyəti hazırda normaldı

Təxminən 1 saat əvvəl tanınmış idman yazarı Rəsul Şükürsoy evinin qarşısında hücuma məruz qalıb. Tanımadığı şəxslər ona bıçaqla xəsarət yetirərək hadisə yerindən qaçıblar.

Hazırda xəstəxanada həkim nəzarətində olan jurnalist hadisəylə bağlı  bunları deyə bildi: "Evə yaxınlaşırdım, iki nəfər mənə tərəf yaxınlaşıb şübhəli hərəkətlər etməyə başladılar. Onlardan biri sanki özünü itirmiş formada üstümə hücum çəkdi. Əlində bıçaq gördüm. Artıq gec idi, özümü müdafiə etməyə macal tapmadım. Bir az gec tərpənsəydim, zərbə sinəmə tuşlanmışdı. Qolumdan yaralanmışam".

Hazırda həkim nəzarətində olan Şükürsoyun vəziyyəti orta-sabit qiymətləndirilir. Hadisəylə bağlı ətraflı məlumat verəcəyik.

Xatırladaq ki, Rəsul buyaxınlarda futbolçu Mahmud Qurbanovun  hücum etdiyi və baş redaktoru Rəşad Ergünə xəsarət yetirdiyi "KomandA" qəzetində köşə yazılarıyla çıxış edir. Jurnalist son iki gündə elektron poçtuna hədə xarakterli məktubların gəldiyini bildirirdi.

-----------            -------------            ------------               -------------

Hadisəylə bağlı son məlumat: Jurnalist Binəqədi rayon 4 saylı Polis Şöbəsində hadisəylə bağlı şikayət ərizəsini təqdim edib.

Hazırda Şükürsoyun vəziyyəti normaldı. Onun hadisəyə münasibəti belə oldu: "Mənim heç kimlə şəxsi ədavətim yoxdu, niyə durduğum yerdə belə hücum etsinlər üstümə?! Xüsusuən, son vaxtlar təhdid dolu məktublar, bilinməyən nömrələrdən gələn zənglər hardasa nədənsə şübhələnməyə əsas verir. Mahmud Qurbanovun "KomandA"nın redaksiyasına hücumundan sonra mənim bu haqda yazdığım hər yazıya "sənin ölümün çatıb" tipli elektron məktublar gəlirdi. Polisə şikayət ərizəsi təqdim olunub. Yenə konkret nəsə fikir bildirmək istəmirəm. Görək də...".