Və ya ziya(n)lı Kazbek Tuayevkimilər

Azərbaycan futbolunun bəlalarından biri də veteranlarıdı. Bunlar nə qədər ki üzdədilər, bir addım da irəli gedə bilməyəcəyik.

Hər bir işdə işıqlı yolu göstərən ziyalı, aydınlar sinfi olur. Bizim futbolun bu sinfi "zərbəçilərdən" ibarətdi. Onların da başında Kazbek Tuayev kimi birisi.

Yeni müsahibəsində AFFA rəhbərliyinə martın 9-da keçiriləcək hesabat-seçki toplanışı, İcraiyyə Komitəsinin cari proseslərə münbasibəti haqda danışıb. Məlumdu da nə deyib...

İnkişaf-minkişaf! Çünki bunların aylıq məvacibi verilir, artıq-əskik nəsə danışacaq iradələri də əlindən alınıb.

Tuayev və bu tip veteranların bu illərdə yarıtmazlıqlarını sadalamağa vaxtım yoxdu, mən onun müsahibəsində lap "ağ edən" bir məqamı qeyd eləmək istəyirəm. Deyib Vaqif Cavadovun millidəki 5 oyunluq cəzası azaldılmalıdı.

Cavadovun futbolçi kimi hansı xarakterə malik olduğunu dəfələrlə vurğulamışıq və diaqnozlarımız əfsus ki, özünü doğruldub. Millidə ona etimad gücləndikcə "buynuzu" böyüyürdü. İş o yerə çatdı ki, millinin formasını təhqir etdi, baş məşqçiyə Avstriya ilə rəsmi oyunda kobud reaksiyalar verdi. Həm də lap çox "şişmişdi". Berti Foqtsun tək-tük bəyəndiyim qərarlarından biri də onu 1 illik millidən uzaqlaşdırılması olmuşdu. Sonra yalvar-yaxar oldu və assosiasiya onun cəzasını 5 oyuna endirdi, ancaq Tuayev boyda birisi durub hələ 5 oyunun da artıq olduğunu püskürdür.

Cavadov bu cəzanı çəkməsə 1 qram da düzəlməyəcək. Adam ya yekəxananın biridi, ya da kənardan idarə olunan "oyuncaq" kimi bir şeydi. Nəysə, özü bilər. Sizə maraqlı o olmalıdı ki, Tuayevə nə çatıb ki, Cavadov üçün ağız açır?

İsgəndər Cavadov! Veteranların öndə gedən daha bir siması.

Tuayevlə yaxındılar. Həm də Vaqif Cavadovun əmisidi. Məlumdu ki, Tuayev də böyük Cavadova xoş gəlmək üçün kiçiyinə görə AFFA rəhbərliyinə səslənib.

Səslənsin e, nəsə deyən yoxdu onsuz, deyilsə də öz bildiklərini ediblər həmişə. Ancaq bir insaf adlı hissiyatı da yada salın arada.

Vaqif bu ölkənin futbolu üçün nə xidmət göstərib ki, ağız dolusu "xidmətinə görə..." ifadəsi işlədirsiz onun haqqında? Millidə oynayıb və qol vurub? Üzr istəyirəm, məgər bunun adı xidmətdi - adam işinə görə çemodan dolu pul alıb da. Xidmət başqa şeydi, Tuayev.

Xidmət sferanı aşmaqdı, Tuayev!

Mənə heç vaxt aydın olmadı, niyə bizim ziyalı adlandırılan təbəqəmiz bir dəfə də olsun aydın bir işin qulpundan yapışmadı?

Bu ölkənin futbolu üçün xidmət göstərmiş ən böyük adlardan biri də 3 ildi kənarda qalan Babək Quliyevdi. Səbəbsiz-filansız, dəlilsiz-zadsız kənarda qalan beynəlxalq dərəcəli referimiz.

Quliyev müstəqillik dövründə Azərbaycan hakimliyinin ən böyük uğurunu qazanmaq üzrəydi, onu naməlum şəkildə sıradan çıxardılar. Nəysə.. o qədər yazmışıq.

Tuayev, hünəriniz çatar bir dəfə də Babək Quliyevin əfv olunması üçün toplaşasız, bəyanat hazırlayasız? Upsss!

AFFA-dan gələn təqaüdünüz kəsilər axı, üzünüzə olmazın sözlər deyiləcək axı... Hansınızda o iradə var e... Gör mən kimlərdən nə gözləyirəm.

Əşşi...

Elçin CƏLİLOV