"Onlar federasiyaya zəng vurub öyrəniblər ki..."

Antalyada təlim-məşq toplanışını davam etdirən "Xəzər Lənkəran"ın futbolçusu Julius Vobayın hazırlıq prosesinə qatılmaması barədə xəbər vermişdik. Buna səbəb kimi syerra-leoneli yarımmüdafiəçinin Türkiyəyə viza almaq problemi ilə üzləşməsi göstərilirdi.

Ancaq sonradan məlum oldu ki, Vobay səhlənkarlıq edərək komandanın düşərgəsinə istirahətdən gec qoşulduğu üçün heyətdən uzaqlaşdırılıb.

Son məlumatlara görə, təcrübəli futbolçu özünə yeni klub tapıb, hətta 6 aylıq müqavilə bağlayıb. Məsələ ilə bağlı "Xəzər Lənkəran"ın vitse-prezidenti Tuyqun Nadirovla əlaqə saxladıq. Klub rəsmisi "FutbolPress"ə açıqlamasında transfer xəbərini təkzib etdi:

"Vobay hazırda Bakıdadı. Baş məşqçimiz Cüneyt Biçər intizamsızlığa görə onu heyətdən kənarlaşdırıb. O, transferə çıxarılıb. Juliusla hazırda bir komanda yaxından maraqlanır, o da Türkiyə Bank Asya liqasında çıxış edən "Ərciyəsspor"du. Onlar federasiyaya zəng vurub öyrəniblər ki, Vobay bizim komandaya məxsusdu.

Ona görə də bizimlə əlaqə saxladılar. Müqavilə şərtləri haqda məlumat aldılar. Biz də öz fikrimizi dedik. Daha sonra bildirdilər ki, əgər şərtlər onları qane etsə, yenidən əlaqə saxlayacaqlar.

Xəbər yayılıb ki, guya Misir klubuna transfer olunub. Ancaq bunlar boş söhbətdi. Misirdən bizə heç bir təklif ünvanlanmayıb. Emeka Opara Küveyt klubuna transfer olunub, vəssalam".