AFFA-da: ...acaq ...əcək!

Ciddi dəyişiliklərin astanasındayıq. AFFA-nın rəhbərlik postlarında "çistka"ların planda olduğu artıq məlumdu.

Əslində bu haqda ötən mövsümün ortalarından yazmağa, deməyə başladılar. Ancaq iddiaların ətrafında geniş müşahidələr və araşdırmalar aparandan sonra müəyyən qədər boşluqların olduğunu görüb, bu haqda proqnozlar bildirmədik.

Zaman gəlib o yerə çatıb ki, nəzərdə tutulan və aram-aram gerçəkləşdirilməyə başlanan ssenarinin ilkin konturları mayak kimi ətrafa işıq saçmaqdadı.

Əslində fikirlərimizin qəliz ifadəsi təfərrüatlarla tam tanış ola bilməməyimizdəndi. Ona görə bunu ehtimal, ancaq reallığa ən yaxın ehtimal kimi dəyərləndirə bilərsiz. Assosiasiya sanki çoxdan "hamilə" qaldığı böyük dəyişikliyi yaxın gələcəkdə nəhayət, "doğacaq"...

İcraiyyə Komitəsinin noyabrın ortalarına nəzərdə tutulan iclası haqda xəbərinz var idi. Bu iclasda üzvlər milli komandanın baş məşqçisi Berti Foqtsun qalıb-qalmayacağını müəyyənləşdirməli, futbola aid dövlət proqramının icrasını müzakirə etməli və s. digər detalları aydınlaşdırmalıydılar.

İK toplanmadı... Foqtsun millidəki taleyinə isə hələ də aydınlıq gəlməyib. Bu səbəblərdən alman çalışdırıcının qalacağı fikri doğruya oxşamağa başlayır. Ancaq bu, belə deyil. Ləngimələrin səbəbi var...

Sizə AFFA-ya gələcək rəhbərin kimliyini hələlik açmırıq. Bundan başqa, bir daha vurğulayırıq, "FutbolPress" olaraq, ötən ildən müzakirəsi başlayanm sözügedən mövzuya ilk dəfə toxunuruq. Səbəb: dəlil və sübutların və ya səhih informasiyaların azlıq təşkil etməsidi. Baxmayaraq ki, təhlil formasında dəyişiklik ssenarisini "deşifrə" etmək olar - ancaq oxucuya daha dəqiq məlumatlar verməyi düşündük.

Yeni gələn "partiya" millidə Foqtsu saxlamayacaq...

Onlar Hakimlər Komitəsində ciddi islahatlar düşünürlər...

Baş katiblik və digər strukturlarda köklü dəyişikliyin planda olduğu bizə məlumdu...

Millinin baş məşqçisi yerli mütəxəssis olacaq...

Futbolun inkişafına dair dövlət proqramının icrası sürətləndiriləcək....

Bunlar planlara daxil olan ümumi detallardı. Fikrimizcə, oxucu üçün ən maraqlı suallardan biri də PFL ilə bağlıdı.

Peşəkar Futbol Liqası ləğv olunacaq, yoxsa..?

Bu haqda hələ də qeyri-müəyyənlik davam edir. Subyektiv mülahizələrimizə görə, PFL tam ayrı funksiyalara malik başqa bir qurumla əvəzlənəcək.

Biz mövzunun izindəyik. Sizə  yaxın gələcəkdə daha təfsilatıyla, geniş məlumatlar verəcəyik.

Elçin CƏLİLOV