2008-ci ilin noyabrın 28-də fəaliyyətə başlayan "Futbol-Press" qəzeti çox yeniliklər eləmişdi; futbol profilli qəzetlərdə yazı dilinə fərqli yanaşma və s. 2009-cu ilin iyulunda fəaliyyətini dayandırmağa məcbur oldu. Həftəlik futbol qəzetləri arasında tirajın önünə çıxan vaxtında...

Heyəti saxlamaq çətinləşdi, "bu gün-sabah" prinsipiylə kollektiv saxlamaq fikrindən uzaq olduğumuz üçün potensiallı heyətin hərəsi bir yerə "dağıldı". İndi hər biri öz işinin sahibidi.

Həmin ilin 1 noyabrında isə Futbolpress.az fəaliyyətə başladı.

Gündə açılıb... kölgədə bağlanan, 3-5 manata düzəldilən saytlardan yox, zamanında ən bahalı proqram təminatı və dizayn ilə ortaya çıxardıq "FutbolPress" brendini. Çalışdıq ki, görüntü varsa, mahiyyət də olsun.

İndi adəti üzrə, "ili çıxan" saytlar kimi, bu abzasda, "elə eləyəcəyik, belə edəcəyik" - tipli şeylər yazmalıydım... Bu abzas onda yazılacaq ki, biz həqiqətən düşüncəmizdə, planlarımızda olan sayt formatını ortaya qoya bilək. Bunun üçün çalışırıq. Maddi tərəfi? Ona da çalışrıq...

Bu gün 2 ili başa vurduq. Ötən il, 1 ilin tamamında heç nə yazmamışdım. Bu gün bunları yazdım. Gələcək illərdə yazmağa sözümüz olsun deyə, doğru, obyektiv və peşəkar olmalıyıq...

Bu 2 ildə fəaliyyətimizdə bizə dəstək olan hər obyektə və subyektə təşəkkür edirik!

2 yaşın mübarək, "FutbolPress"!

Elçin