"Kəpəz"i yendik, növbədə "Neftçi"di

"Kəpəz"i minimal hesabla məğlub edib (1:0) liderliyini daha da möhkəmlədən "Xəzər Lənkəran"ın baş məşqçisi Mirça Rednik oyundan sonra "FutbolPress"in əməkdaşının bəzi suallarını cavablayıb.

- Komanda qələbə qazansa da, artıq bir neçə oyunduu müdafiədə buraxılan kobud səhvlər nəzərdən qaçmır. Ümumiyyətlə komandada müdafiəçi ampulasında çıxış edən futbolçu demək olar ki yoxdu.
- Başqa yolumuz yoxdu. Şəhriyar sağ cinah müdafiəçisidi, məcburam onu sol cinahda oynadım. Bütün çətinliklərə baxmayaraq cəmi 7 qol buraxmışıq. Ən az qol buraxan komandalardanıq.

- Kamran Ağayevlə bağlı müxtəlif fikirlər səslənir. Qolkiper mətbuata son açıqlamalarında klubdan və azərkeşlərdən incidiyini bildirir. Sanki getmək istəyir...
- Mənim heç kimlə konfliktim yoxdu. Kamran nə vaxt yaxşı oynayır, deyirəm yaxşıdı, nə vaxt pis oynayır, deyirəm pisdi. "Xəzər Lənkəran" nə Kamrandan ibarətdi, nə də, Mirça Rednikdən. Bütün futbolçular nizam-intizama riayyət etməlidilər.
Başqa komandaya keçmək istəməsindən xəbərim yoxdu. Kamran üçün elə "Xəzər Lənkəran" yaxşıdı.

- Rikardo Qomeş deyəsən gəlmək fikrində deyil. Futbolçu haqda qərarınız nədi?
- Biz ona zəng edirik, yoldaşı götürür, ya da ki qızı, heç bir xəbər ala bilmirik. Olmasın Rikardo, olmasın Parks - heç bir problem yoxdur. "Xəzər Lənkəran" həmişə qalib gəlir onsuz. Hər halda, qayıdandan sonra Rikardonu ən sərt cəza gözləyir.

-Çempionluq yarışında komandanı ardı-arda izləyən komandalardan biri "Neftçi"di. Növbəti turdaki rəqibinizdi həm də...
- Mənim üçün "Neftçi" ilə oyun həmişə xüsusi əhəmiyyət kəsb edir. Artıq "Kəpəzi" məğlub etdik, növbədə "Neftçi"di.

Tural OZAN